Lotu ‘I Hono Huafa


Pulelulu 31

Lotu ‘I Hono Huafa

Pea ʻi he ʻaho ko ia ʻe ʻikai te mou fehuʻi ha meʻa ʻe taha kiate au. Ko e moʻoni, ko e moʻoni, ʻoku ou tala kiate kimoutolu, Ko e meʻa kotoa pē te mou kole ki he Tamai ʻi hoku Huafa, te ne foaki kiate kimoutolu. ʻOku teʻeki ai te mou kole ha meʻa ʻi hoku Huafa: kole, pea te mou maʻu, koeʻuhi ke kakato ai hoʻomou fiefia (Sione 16:23-24).

Na’e ‘ikai teitei fakahā ‘e Sisū ke tau ui ki he kakai mā’oni’oni kuo ‘alu ki hevani ke lotu ma’a kitautolu, hangē ko ia ‘oku fai ‘e he ni’ihi Kalisitiane he ‘aho ni. Na’a mo Sisū na’a Ne pehē na’a mo Ia tonu (Sisū) ‘e ‘ikai lotu ma’au, koe’uhi ‘oku ‘ofa foki ‘a e Tamai kiate koe. Koia, ko e fakakaukau ‘oku ‘i he tafa’aki ‘o e Tamai ‘a Sisū, ‘o kole fakamamahi koe’uhi ko kitautolu, hangē ko e ma’u hala ‘a e kau Kalisitiane ni’ihi, ‘oku ‘ikai fakafolofola ia. Lau ‘Ene folofola, “ʻI he ʻaho ko ia te mou kole ʻi hoku Huafa: pea ʻoku ʻikai te u pehē kiate kimoutolu, te u fakakolekole ki he Tamai koeʻuhi ko kimoutolu: He ʻoku ʻofa ʻa e Tamai foki kiate kimoutolu...” (Sione 16:26-27).

Hangē ko ia kuo tau lau ‘i he’etau folofola ‘o e ‘aho ni, na’a Ne ako’i kitautolu ki he founga ke lotu ‘aki, ‘a ia ko e lotu ‘i Hono Huafa, kae ‘ikai fou ‘i Hono Huafa. ‘Oku na faikehekehe lahi. Ko e lotu fou ‘i Hono Huafa ko e ngaohi ia ‘o Ia ke hangē ha taha fakalou’akau. Ko e lotu ‘i Hono Huafa ko e ngāue’i ia ‘o e mālohi fakafofonga fakalao kuo Ne foaki kiate kitautolu. Ko e taimi hoko te ke fanongo ai ki ha taha ‘oku lotu mo faka’osi ‘aki ‘a e “fou ‘ia Sisū Kalaisi ko homau ‘Eiki,” fakahā ki he tokotaha ko ia ‘oku te’eki lotu ia, koe’uhi ‘e ‘ikai tali ‘a e lotu na’e toki fai.

‘E lava keke pehē, “Ka kuo fuoloa ‘eku lotu pehē ni mo ma’u ‘a e tali”; ‘oku hoko ia koe’uhi ‘oku ke kei pēpē fakalaumālie, pea ‘oku fakatatali mai ‘a e ‘Otua keke hoko ā ‘o matu’otu’a. ‘Oku fakahā ‘e he Tohitapu “Pea naʻe ʻikai fie ʻafioʻi ʻe he ʻOtua ʻa e ngaahi kuonga ʻo e vale ni, ka ʻoku ne fekau eni ki he kakai kotoa pē, ʻi he potu kotoa pē, ke nau fakatomala” (Ngāue 17:30). Kapau ‘oku ke pehē ‘oku ‘ikai fu’u mahu’inga eni, kapusi ‘a e laumalie ‘uli ‘aki ho lea, “Fou ‘i he Huafa ‘o Sisū, ‘oku ou fekau koe ke ke ‘alu kitu’a”; ‘e ‘ikai ngāue ia, koe’uhi ‘oku ‘ikai ko e me’a ia ‘oku talamai ‘e he Folofola.

Na’e fakahā ‘e Sisū ‘ia Ma’ake 16:17, “Pea ko e ngaahi fakaʻilonga eni ʻe hoko kiate kinautolu ʻoku tui: Te nau kapusi ʻa e kau tēvolo ʻi hoku Huafa; te nau lea ʻaki ʻa e ngaahi lea foʻou”; na’e ‘ikai ke Ne pehē, “fou ‘i hoku Huafa...” Ko e lotu ‘i Hono Huafa ko e ma’u ia Hono mafai, ‘Ene lāngilangi mo Ia tonu foki. Ko e taimi te ke kole ai ki he Tamai ha me’a pē fai tu’utu’uni ‘i he Huafa ‘o Sisū, ‘oku hangē tofu ko Sisū ia ‘oku lotu. ‘Oku tau mo’ui ‘i Hono Huafa. Haleluia!

Lotu

‘Apā Tamai, ‘oku ou fakamālo kiate koe ‘Eiki ko e totonu fakalao ke u lotu ‘i he Huafa ‘o Sisū pea ma’u ‘a e tali. Na’a mo e taimi ni, ‘oku ou fakahā ‘oku monū’ia hoku ‘aho, fualahi mo fonu he ngaahi tāpuaki ‘i he Huafa ‘o Sisū. ‘Emeni.

Fakalahi Ako:

Filipai 2:5-11; Sione 14:13

LAU TOHITAPU TA‘U 1

Mātiu 21:33-22:1-14; ‘Ekisoto 20-21

LAU TOHITAPU TA‘U 2

Ngāue 14:1-7 Siope 32-33

Leave comments on today’s devotional at www.rhapsodyofrealities.org

#Otherlanguages

3 views

Copyright 2020. Christ Embassy Hawaii Non-profit Christian Church |

  • Facebook